पेजावर मठाच्या विद्यार्थी वसतिगृहासाठी २५ लाख रुपयांचे अनुदान
आमदार बसनगौडा पाटील यत्नाळ यांच्या हस्ते भूमिपूजन
विजयपूर / प्रतिनिधी- दिपक शिंत्रे
शहरातील पेजावर मठाच्या अखिल भारत माध्व महामंडळ विद्यार्थी वसतिगृहासाठी २५ लाख रुपयांचे अनुदान मंजूर झाल्याच्या पार्श्वभूमीवर शहराचे आमदार बसनगौडा पाटील यत्नाळ यांच्या हस्ते भूमिपूजन करण्यात आले.
यानंतर बोलताना बसवनगौडा पाटील यांनी सांगितले की, हिंदू सनातन धर्माचे जतन आणि संवर्धन करण्यामध्ये उडुपी येथील पेजावर मठाचे पूजनीय स्वामी श्री विश्वेशतीर्थ श्रीपाद यांचे योगदान अतिशय मोठे आहे. ते सतत देशभर प्रवास करून हिंदू धर्माबाबत जनजागृती करत होते. सध्याचे पीठाधीश्वर श्री विश्वप्रसन्नतीर्थ स्वामीही त्याच मार्गाने कार्य करत असल्याचा अभिमान असल्याचे त्यांनी नमूद केले.
पन्नास वर्षांपूर्वी शैक्षणिकदृष्ट्या मागासलेल्या विजयपूर जिल्ह्यात विद्यार्थी वसतिगृह सुरू करून गरीब विद्यार्थ्यांच्या शिक्षणासाठी सुविधा उपलब्ध करून देणे हे खरोखरच प्रशंसनीय कार्य असल्याचे त्यांनी सांगितले. आता नवीन इमारत उभारून आधुनिक सुविधांसह विद्यार्थ्यांना शिक्षणाची सोय केली जात आहे. यासाठी शासनाच्या २५ लाख रुपयांच्या अनुदानासोबतच आपल्या संस्थेतर्फे आणखी २१ लाख रुपयांची देणगी देण्याची घोषणा त्यांनी केली. तसेच इमारतीच्या बांधकामाची जबाबदारी स्वीकारण्याचे आश्वासनही दिले. इतर दात्यांकडूनही निधी मिळवून देण्यासाठी प्रयत्न करणार असल्याचे त्यांनी सांगितले.
मठाचे मानद अध्यक्ष गोपाल नाईक यांनी आपल्या भाषणात बसनगौडा पाटील यत्नाळ आणि पेजावर मठ यांच्यातील घनिष्ठ संबंधांचा उल्लेख केला. पूजनीय श्री विश्वेशतीर्थ स्वामींच्या ६० व्या पीठारोहण सोहळ्यावेळी विजयपूरमध्ये आयोजित कार्यक्रमात बसनगौडा यांनी समिती अध्यक्ष म्हणून काम पाहिले होते. त्यावेळी त्यांनी श्रीकृष्ण मंदिर उभारण्याची मागणी स्वामींसमोर मांडली होती. पुढे खासदार झाल्यानंतर त्यांनी श्रीकृष्ण मठाच्या बांधकामासाठी १० लाख रुपयांचे अनुदान देऊन ती मागणी पूर्ण केली. हे त्यांच्या श्रद्धा आणि भक्तीचे प्रतीक असल्याचे गोपाल नाईक म्हणाले.
आजपर्यंत मठाच्या विकासासाठी आणि विद्यार्थी वसतिगृहासाठी त्यांचे सहकार्य सातत्याने सुरू असल्याचे त्यांनी सांगितले. सिद्धेश्वर संस्थेमार्फत कल्याण मंडप, शैक्षणिक संस्था, रुग्णालय आणि विविध सामाजिक उपक्रमांच्या उभारणीत त्यांचे योगदान आदर्शवत असल्याचे त्यांनी नमूद केले.
मठाचे सचिव प्रकाश अक्कलकोट यांनी प्रास्ताविकात बसनगौडा यत्नाळ आणि पेजावर मठ यांच्यातील संबंधांवर प्रकाश टाकला. त्यांनी मठासाठी केलेल्या सेवांची आठवण करून देत, मठाच्या गुरुजनांचा पूर्ण आशीर्वाद त्यांच्यावर असल्याचे सांगितले.
या प्रसंगी मठाच्या वतीने बसनगौडा पाटील यत्नाळ यांचा फळे, पुष्पगुच्छ आणि श्रीकृष्णाची मूर्ती देऊन सत्कार करण्यात आला. तसेच अखिल कर्नाटक ब्राह्मण महासभा, विजयपूरचे प्रतिनिधी सतीशचंद्र कुलकर्णी, विजयपूर हॉटेल मालक संघटनेचे अध्यक्ष चंद्रकांत शेट्टी, महानगरपालिका सदस्य प्रेमानंद बिरादार आणि गिरीश बिरादार यांचाही सन्मान करण्यात आला.
कार्यक्रमास मठाचे सदस्य डॉ. मंगळगी, डॉ. मलघाण, व्ही. सी. कुलकर्णी, मोहन कौताळ, अशोकराव, विकास पदकी, विजय जोशी आदी मान्यवर उपस्थित होते. प्रारंभी पंडित वासुदेव आचार्य आणि समीर आचार्य यांच्या वेदघोषाने कार्यक्रमाची सुरुवात झाली. विकास पदकी यांनी आभार प्रदर्शन केले, तर गोविंद देशपांडे यांनी सूत्रसंचालन केले.
