आपण आपल्या क्षमतेनुसार इतरांना मदत करण्याचा संकल्प करावे -आमदार विठ्ठल कट्टकधोंड
विजयपूर/ प्रतिनिधी- दिपक शिंत्रे
आपण आपल्या क्षमतेनुसार इतरांना मदत करण्याचा संकल्प केला पाहिजे. प्रत्येक व्यक्तीने मदतीची छोटी सवय अंगीकारल्यास संपूर्ण जग अधिक सुंदर आणि शांततामय होऊ शकते, असे मत नागठाण मतदारसंघाचे आमदार विठ्ठल कट्टकधोंड यांनी व्यक्त केले.
विजयपूर येथील कर्नाटक राज्य अक्का महादेवी महिला विद्यापीठ येथे आर्ट ऑफ गिव्हिंग फाउंडेशन आणि महिला विद्यापीठ यांच्या संयुक्त विद्यमाने “आर्ट ऑफ गिव्हिंग” स्थापना दिन साजरा करण्यात आला. कन्नड भवन येथे मान्यवर, अधिकारी, शिक्षणतज्ज्ञ आणि विद्यार्थ्यांच्या उपस्थितीत उद्घाटन समारंभ पार पडला. देशभरातील ८०० हून अधिक जिल्ह्यांमध्ये होत असलेल्या राष्ट्रीय स्थापना दिन उपक्रमाचा हा एक भाग होता.
कार्यक्रमाचे उद्घाटन करताना आमदार विठ्ठल कट्टकधोंड म्हणाले की, मानवतेची सेवा करणे हीच सर्वोच्च भक्ती आहे. “आर्ट ऑफ गिव्हिंग” आंदोलनाच्या माध्यमातून मानवतावादी आणि निःस्वार्थ सेवेचा संदेश जगभर पोहोचविणारे डॉ. अच्युत सामंत यांचे त्यांनी कौतुक केले. दया, सहानुभूती आणि सामाजिक जबाबदारीची भावना जागृत करण्यात या चळवळीने मोठा प्रभाव निर्माण केल्याचे त्यांनी सांगितले.
“शाईन टू शेअर” या २०२६ च्या संकल्पनेचे स्पष्टीकरण देताना आर्ट ऑफ गिव्हिंगच्या कर्नाटक राज्य युवा संयोजिका शिफा जमादार म्हणाल्या की, जग “घेण्याच्या कले”त गुंतलेले असताना फारच कमी लोक “देण्याची कला” प्रत्यक्षात आचरणात आणतात. वाटणे म्हणजे केवळ पैसा किंवा वस्तू देणे नव्हे, तर प्रेम, माया, आनंद आणि निःस्वार्थ भावनेची देवाणघेवाण करणे होय. “घेण्यापेक्षा देण्यात अधिक आनंद असतो,” असे त्यांनी नमूद केले.
कार्यक्रमाच्या अध्यक्षस्थानी बोलताना विद्यापीठाच्या कुलगुरू प्रा. विजया बी. कोरीशेट्टी यांनी मानवतेसाठी केलेली प्रत्येक सेवा ही “देण्याच्या कले”चे स्वरूप असल्याचे सांगितले. विद्यार्थ्यांनी निःस्वार्थता, कृतज्ञता आणि दयाळूपणाची मूल्ये आत्मसात करून समाजासाठी सकारात्मक योगदान द्यावे, असे आवाहन त्यांनी केले.
क्रीडा भावना आणि युवक सक्षमीकरणाला प्रोत्साहन देण्याच्या उद्देशाने विद्यापीठातील खेळाडूंना उच्च दर्जाचे व्हॉलीबॉल किट्स वितरित करण्यात आले.
या कार्यक्रमात कुलसचिव शंकरगौड एस. सोमनाळ, आयटीएस अधिकारी इशिता गुप्ता, मूल्यमापन कुलसचिव प्रा. बी. एल. लकण्णावर तसेच राष्ट्रीय युवा पुरस्कार विजेत्यांच्या संघटनेचे राष्ट्रीय अध्यक्ष डॉ. जावेद जमादार यांनी मनोगत व्यक्त केले.
यावेळी प्रा. नामदेवगौड, प्रा. चिंतामणी, डॉ. दीपक शिंदे, डॉ. प्रजापती, डॉ. गुलाब राठोड, डॉ. शीतलराणी कावळे तसेच विद्यापीठातील प्राध्यापक उपस्थित होते. कार्यक्रमाच्या प्रारंभी विद्यापीठाचे एनएसएस समन्वयक डॉ. प्रकाश सन्नक्कनवर यांनी स्वागत केले. कु. नंदिनी यांनी आभार मानले.
