नागरबेट्टा येथील दलित युवकाच्या हत्येच्या पार्श्वभूमीवर: पीडित कुटुंबाला 4.12 लाखांचा मदत धनादेश वितरित
मृताच्या घरी अधिकाऱ्यांची भेट; एकूण ₹8 लाखांच्या मदतीपैकी पहिला हप्ता अदा, अन्नधान्य किटचे वितरण
विजयपूर/ प्रतिनिधी- दिपक शिंत्रे
जिल्ह्यातील मुद्देबिहाळ तालुक्यातील नागरबेट्टा गावातील एका कंपनीत नुकत्याच झालेल्या हत्येत मृत्यूमुखी पडलेल्या दलित युवक रविचंद्र मादर यांच्या कुटुंबाला जिल्हा प्रशासनाने मदतीचा हात दिला आहे. विविध विभागांतील जिल्हास्तरीय वरिष्ठ अधिकाऱ्यांनी मृताच्या घरी भेट देऊन कुटुंबीयांचे सांत्वन केले तसेच कायद्यानुसार मंजूर करण्यात आलेली आर्थिक मदत प्रदान केली.
सरकारकडून मंजूर करण्यात आलेल्या एकूण ₹ 8 लाखांच्या मदतीपैकी पहिल्या हप्त्याच्या स्वरूपात सुमारे ₹ 4.12 लाखांचा धनादेश अधिकाऱ्यांनी कुटुंबीयांकडे सुपूर्द केला. याचवेळी स्थानिक ग्रामपंचायतीतर्फे मोफत अन्नधान्य किटचेही वितरण करण्यात आले.
### अधिकाऱ्यांची भेट आणि सांत्वन
मदत वितरणाच्या वेळी अपर जिल्हाधिकारी डॉ. औद्राम, जिल्हा समाजकल्याण विभागाचे अधिकारी महेश पोतदार, पोलीस अधीक्षक श्रीनाथ जोशी*, डीवायएसपी संदीपसिंग मुरगूड आणि पीएसआय संजय टिप्पारेड्डी यांनी कुटुंबीयांची भेट घेऊन त्यांना धीर दिला.
यावेळी समाजकल्याण विभागाचे व्यवस्थापक एस. एम. पाटील, नोडल अधिकारी बी. एस. नाटीकर, तालुका पंचायत कार्यकारी अधिकारी संगनगौडा बिरादार, समाजकल्याण विभागाच्या सहाय्यक संचालिका बसंती मठ*, एच. एम. हेब्बळी महसूल निरीक्षक व्ही. व्ही. अंबिगेर, तालुका पंचायत व्यवस्थापक वीरेश हुगार, ग्राम प्रशासन अधिकारी शिवशरण कुंभार, जिल्हा अत्याचार प्रतिबंधक समितीचे सदस्य मलू तळवार तसेच दलित नेते हरीश नाटीकर, सी. जी. विजयपूर, तिप्पण्णा दोड्डमनी, प्रकाश चलवादी, वाय. एस. चलवादी ,बहाद्दूर राठोड यल्लप्पा चलवादी*, हुलगप्पा मादर यांच्यासह स्थानिक दलित नेते आणि ग्रामस्थ उपस्थित होते.
