"आपण जे काही करतो, तेच मुले अनुकरण करतात" – डॉ. गुरुराज पाटील
विजयपूर/ प्रतिनिधी- दिपक शिंत्रे
: आपण पालक म्हणून जे काही करतो, त्याचं अनुकरण आपली मुले करतात, असं मत प्रख्यात मानसोपचार तज्ज्ञ आणि उत्कृष्ट प्रशिक्षक डॉ. गुरुराज पाटील (हुबळी) यांनी व्यक्त केलं. ते विजयपूर तालुक्यातील कन्नूर येथील शांतिकुटीर येथे मागील २३ वर्षांपासून चालू असलेल्या मोफत शैक्षणिक व आध्यात्मिक उन्हाळी शिबिरामध्ये आयोजित केलेल्या पालक सभेत बोलत होते.
या शिबिरातील पालक सभेत त्यांनी स्वतःच्या मुलाचा अनुभव शेअर केला. सहावीत असताना त्यांच्या मुलाचे गुण कमी आले होते. शाळेच्या मुख्याध्यापकांनी पालक सभेत नाराजी व्यक्त केली होती. तेव्हा डॉ. पाटील यांनी "एक वर्ष संधी द्या, मी बदल घडवून आणतो" असं सांगितलं आणि प्रयत्न सुरू केले. त्या प्रयत्नांमुळे त्यांच्या मुलामध्ये उल्लेखनीय प्रगती झाली आणि तो चांगला विद्यार्थी म्हणून पुढे आला.
मुलांच्या योग्य प्रगतीसाठी पालकांनी त्यांच्या अभ्यासाकडे लक्ष द्यावं, त्यांच्या आवडीनुसार शिकवण्याचा प्रयत्न करावा, असं ते म्हणाले. रोजच्या धावपळीत थोडा वेळ का होईना, पालकांनी मुलांशी संवाद साधावा, त्यांना शाळेतल्या घडामोडी सांगायला प्रोत्साहित करावं. अशा संवादामुळे मुलं आणि पालक यांच्यातील नातं घट्ट होतं. त्यांनी याला 'सुवर्णक्षण' असं संबोधलं.
अभ्यासासोबत रोज १-२ तास खेळायला द्यावं, असंही त्यांनी सांगितलं. तसंच, दररोज निदान एकदा तरी संपूर्ण कुटुंबाने एकत्र जेवावं किंवा एकाच टीव्ही चॅनेलवर कार्यक्रम पाहावा, असा सल्ला त्यांनी दिला.
शेवटी, श्री. राजेश गोंधळी यांनी पालक सभेबाबत प्रशंसा व्यक्त करत, अशा प्रकारच्या सभा आजच्या काळात अत्यंत गरजेच्या असल्याचं मत मांडलं
कार्यक्रमाचं संचालन श्री. शरणबसप्प एम.जी. यांनी केलं. प्रारंभी श्रीशैलेश्वर विद्याकेन्द्रचे प्रशासक कुमार एस. नानावटे यांनी मनोगत व्यक्त केलं. शेवटी रामराज्य कला मंचाचे अध्यक्ष श्रीकृष्ण संपगांवकर यांनी सर्वांचे आभार मानले आणि डॉ. गुरुराज पाटील यांचा सत्कार केला.
या वेळी श्री. अजित कन्नूर, श्री. वाय.एच. पवार, चाणक्य करिअर अकॅडमीचे शिक्षक, सांडूर येथील श्रीशैलेश्वर विद्याकेन्द्रचे शिक्षक तसेच कन्नूर व आसपासच्या गावांतील सुमारे २०० पालक उपस्थित होते.
