एम. बी. पाटील यांना उपमुख्यमंत्रीपद मिळणार का ❓
विजयपूर/ प्रतिनिधी- दिपक शिंत्रे
कर्नाटकच्या राजकारणात पुन्हा एकदा उपमुख्यमंत्री पदाच्या चर्चांना उधाण आले असून, राज्याचे उद्योगमंत्री एम. बी. पाटील यांना उपमुख्यमंत्री पद दिले जाणार का, याबाबत राजकीय वर्तुळात चर्चा सुरू झाली आहे. सध्या सिद्धरामय्या यांच्या नेतृत्वाखालील सरकारमध्ये डी. के. शिवकुमार हे उपमुख्यमंत्री म्हणून कार्यरत आहेत.
उत्तर कर्नाटकातील प्रभावी लिंगायत नेते म्हणून ओळख असलेले एम. बी. पाटील यांनी अनेक महत्त्वाची मंत्रीपदे सांभाळली आहेत. जलसंपदा, गृहमंत्री तसेच सध्या उद्योग आणि पायाभूत सुविधा विकास मंत्री म्हणून त्यांनी काम केले आहे. त्यामुळे त्यांना सरकारमध्ये अधिक मोठी जबाबदारी देण्याबाबत पक्षांतर्गत चर्चा होत असल्याची माहिती समोर येत आहे.
विशेषतः उत्तर कर्नाटकातील प्रतिनिधित्व, लिंगायत समाजाचे राजकीय महत्त्व आणि आगामी राजकीय समीकरणे लक्षात घेता एम. बी. पाटील यांचे नाव उपमुख्यमंत्री पदासाठी चर्चेत असल्याचे सांगितले जात आहे. मात्र, याबाबत काँग्रेस पक्ष किंवा राज्य सरकारकडून कोणतीही अधिकृत घोषणा करण्यात आलेली नाही.
सध्या ही चर्चा राजकीय पातळीवर सुरू असली तरी एम. बी. पाटील यांना उपमुख्यमंत्री पद मिळणार की नाही, याचा अंतिम निर्णय काँग्रेस पक्षश्रेष्ठी आणि राज्य नेतृत्वाकडूनच घेतला जाणार आहे.
