कार अपघातात पोलीस विभागातील जीएचओचा मृत्यू
विजयपूर/ प्रतिनिधी-दिपक शिंत्रे
हैदराबादहून मुलीला घेऊन ताळिकोट मार्गे बागलकोटकडे येत असताना ताळिकोटजवळ कारचा झाडाला धडक बसून बागलकोट जिल्हा पोलीस कार्यालयात जीएचओ म्हणून कार्यरत असलेले निसारहमद अब्दुलरजाक हिप्परगी (वय ५०) यांचा सोमवारी पहाटे सुमारे २ वाजता जागीच मृत्यू झाला.
निसारहमद हिप्परगी यांनी मुलगी नेहा हिला आयपीएस कोचिंगसाठी हैदराबाद येथे सोडले होते. कोचिंगनंतर आणि आयपीएस परीक्षा संपल्यानंतर ते मित्र बसवराज सोना यांच्यासह मुलगी नेहाला घेऊन परत येत होते. ताळिकोटजवळ आल्यानंतर वळणावर निसारहमद यांची कार रस्त्याच्या उजव्या बाजूला असलेल्या झाडाला धडकली. या अपघातात निसारहमद हिप्परगी यांचा जागीच मृत्यू झाला, अशी तक्रार मृताचे जावई अजीजहमद कुडची यांनी ताळिकोट पोलीस ठाण्यात दाखल केली आहे.
अपघातावेळी कारमध्ये असलेली मुलगी नेहा (वय २२) आणि मृत निसारहमद यांचे मित्र तसेच पोलीस विभागातील एएसआय बसवराज सोना (वय ५१) हे गंभीर जखमी झाले असून त्यांना जिल्हा रुग्णालयात दाखल करण्यात आले आहे.
घटनास्थळी डीवायएसपी चंद्रकांत नंदरेड्डी, सीपीआय महमद पसीउद्दीन, पीएसआय श्रीमती ज्योती खोत आणि गुन्हे शाखेचे पीएसआय एस. एम. पडशेट्टी यांनी भेट देऊन पुढील तपास सुरू केला आहे.
