पहाटेच गर्जले जेसीबी; विजयपूर शहरात अतिक्रमण हटवण्याची मोहीम
विजयपूर / प्रतिनिधी- दिपक शिंत्रे
शहरातील रहिवासी आज पहाटेच जेसीबी यंत्रांच्या आवाजाने जागे झाले. शहर महानगरपालिकेकडून अतिक्रमण हटवण्याची मोहीम सुरू करण्यात आली.
अतौला सर्कलपासून जुम्मा मशिदीच्या रस्त्यापर्यंतच्या मुख्य मार्गावर ही कारवाई करण्यात आली. वाहतुकीस अडथळा निर्माण करणारी अनधिकृत बांधकामे आणि अतिक्रमणे हटवणे हा या कारवाईचा मुख्य उद्देश होता.
ही कारवाई महानगरपालिका आयुक्त विजयकुमार मेक्कळकी यांच्या मार्गदर्शनाखाली पार पडली. अधिकाऱ्यांच्या माहितीनुसार, दुकानमालकांना पूर्वीच नोटीस देऊन अतिक्रमणे काढून टाकण्याच्या सूचना देण्यात आल्या होत्या. मात्र, दिलेल्या मुदतीत अनेकांनी कारवाई न केल्यामुळे अधिकाऱ्यांनी स्वतः पुढाकार घेतला.
या वेळी बोलताना आयुक्त मेक्कळकी यांनी सांगितले की, शहराचा सर्वांगीण विकास आणि वाहतूक सुलभ करण्यासाठी अशा उपाययोजना आवश्यक आहेत. यामुळे शहरात शिस्त आणि पायाभूत सुविधांच्या विकासाला चालना मिळेल, असेही त्यांनी नमूद केले.
कारवाईदरम्यान कोणतीही अनुचित घटना घडू नये यासाठी पालिका कर्मचारी आणि पोलिस बंदोबस्त करण्यात आले होते.
शहर स्वच्छ आणि सुव्यवस्थित ठेवण्याच्या उद्देशाने आगामी काळात शहराच्या इतर भागांतही अशा कारवाया करण्यात येतील, असे अधिकाऱ्यांनी सांगितले.
