आलमट्टी भूमी अधिग्रहण अधिकारी व पुनर्वसन अधिकाऱ्यांच्या कार्यालयावर लोकायुक्तांच्या छापा
विजयपूर/ प्रतिनिधी- दिपक शिंत्रे
सार्वजनिकांकडून प्राप्त झालेल्या तक्रारींच्या आधारे कृष्णा वरच्या कालवा प्रकल्पाच्या (यूकेपी) विशेष भूमी अधिग्रहण अधिकाऱ्यांचे (एसएलओ) कार्यालय तसेच पुनर्वसन अधिकाऱ्यांचे (आरओ) कार्यालय यांच्यावर विजयपूर लोकायुक्त पोलिसांनी सोमवारी छापा टाकला.
या दोन्ही कार्यालयांवर सुमारे २५ लोकायुक्त पोलिसांच्या पथकाने दिवसभर तपासणी केली असून, पुढील दोन-तीन दिवस कागदपत्रांची सखोल तपासणी सुरू राहण्याची शक्यता आहे.
विशेष भूमी अधिग्रहण अधिकारी व पुनर्वसन अधिकारी कार्यालयांमध्ये बाधितांना देण्यात येणाऱ्या नुकसानभरपाईच्या वितरणात, सार्वजनिक उद्देशासाठी जमीन संपादन करताना, पाण्याखाली गेलेल्या गावांतील लोकांना पुनर्वसन सुविधा देण्यात झालेल्या त्रुटी, तसेच जमिनी गमावलेल्या लोकांना न्यायालयामार्फत अधिक मोबदला मिळवून देण्याचे आश्वासन देत मध्यस्थांमार्फत लाच मागितल्याच्या तक्रारी, पुनर्वसन व पुनर्स्थापना योजना योग्य प्रकारे राबविण्यात झालेली निष्क्रियता, जमिनीच्या किमतीच्या निर्धारणातील गैरव्यवहार, बेकायदेशीर जमीन अधिग्रहण, मध्यस्थांचा नफा, अधिकारांचा दुरुपयोग आणि कर्तव्यातील दुर्लक्ष या संदर्भातील तक्रारींवरून लोकायुक्त न्यायमूर्ती बी. एस. पाटील यांनी स्वतःहून दखल घेत या दोन्ही कार्यालयांची तपासणी व झडती घेण्यासाठी वॉरंट जारी केले होते
लोकायुक्तांच्या सूचनेनुसार विजयपूर जिल्हा पोलिस अधीक्षक टी. मल्लेश यांच्या मार्गदर्शनाखाली डीवायएसपी मल्लिकार्जुन तुलसिगेरी यांच्या नेतृत्वात पोलिस निरीक्षक आनंद टक्कन्नवर, आनंद दोणी, निंगप्पा पूजारी तसेच विजयपूर लोकायुक्त पोलिस ठाण्याचे कर्मचारी यांनी कार्यालयांची तपासणी सुरू केली असून कागदपत्रांची पडताळणी सुरू असल्याची माहिती लोकायुक्त कार्यालयाने दिली आहे.
**बॉक्स**
सोमवारी आलमट्टी यूकेपीच्या पुनर्वसन अधिकारी कार्यालयांवर लोकायुक्त पोलिसांनी छापा टाकला असता बाधित नागरिकांनी आपल्या समस्या लोकायुक्त अधिकाऱ्यांसमोर मांडल्या.
दररोज शेकडो बाधित नागरिक या दोन्ही कार्यालयांत आपल्या कामांसाठी येत असतात. सोमवारी छाप्यादरम्यान अनेकांनी आपल्या अडचणी व त्यांच्या निराकरणातील होत असलेल्या विलंबाबाबत तक्रारी केल्याचे दिसून आले.
