मनगूळी बँक दरोडा प्रकरण — अजून एका आरोपीसाठी सापळा
विजयपूर/ प्रतिनिधी- दिपक शिंत्रे
गेल्या *मे महिन्यात मनगूळीतील केनरा बँकेत घडलेल्या दरोडा प्रकरणात आतापर्यंत १५ आरोपींना अटक करण्यात आली असून, पोलिसांनी ४३.५६५ किलो सोनं, ₹१.३८ कोटी रोकड गुन्ह्यासाठी वापरलेले ५ कारसह एकूण ₹४४.४८ कोटींचा मुद्देमाल जप्त केला आहे.
या प्रकरणाबाबत अधिक माहिती देताना कायदा-सुव्यवस्था विभागाचे एडीजीपी हितेंद्र यांनी सांगितलं की, तपास अजूनही सुरू आहे. अटकेत असलेल्या आरोपींना पोलीस कोठडीत घेऊन कसून चौकशी केली जात आहे. त्यांच्या माहितीच्या आधारे अधिक ४.८ किलो सोनं आणि ₹२२ लाखांची रोकड हस्तगत करण्यात आली आहे. मात्र, अजून एक आरोपी फरार असून, त्याच्या अटकेसाठी सापळा रचण्यात आला आहे असे त्यांनी सांगितले
**दरोड्याचं पार्श्वभूमी:**
२३ मे २०२५ रोजी मनगूळी केनरा बँकेत दरोडा टाकून आरोपींनी सुमारे ५३.२६ कोटी रुपये किमतीचं ५८.९७ किलो सोनं (५८,९७६.९४ ग्रॅम) आणि ₹५,२०,४५० रोकड लुटून नेली होती. आरोपी बँकेतील सीसीटीव्ही कॅमेऱ्यांचे NVR उपकरण सुद्धा चोरून कोणतेही पुरावे उरू नयेत म्हणून ते घेऊन पसार झाले होते.
तथापि, पोलीस खात्याने अतिशय चाणाक्षतेने तपास करून या गुन्ह्याचा यशस्वी छडा लावला आहे, असं एडीजीपी हितेंद्र यांनी सांगितले.
