विजयपूरात कर्नाटक पोलिस मॅरेथॉन, स्पर्धकांचा उत्स्फूर्त सहभाग
जिल्हा पालकमंत्री डॉ. एम.बी. पाटील यांच्या हस्ते प्रारंभ
विजयपूर/ प्रतिनिधी- दिपक शिंत्रे
विजयपूर जिल्हा पोलिस विभागाने रविवारी जगप्रसिद्ध गोलगुम्बज परिसरात आयोजित केलेल्या "ड्रग्स फ्री कर्नाटक", "फिटनेस फॉर ऑल" आणि "आमचे पोलिस आमचा अभिमान" या थीम अंतर्गत कर्नाटक पोलिस रन 2025 मॅरेथॉन 5 किमी धावण्यास मोठ्या उत्साहात आणि स्पर्धकांचा उत्स्फूर्त सहभागात संपन्न झाला.
मध्यवर्ती उद्योग, पायाभूत सुविधा विकास खात्याचे मंत्री आणि जिल्हा पालकमंत्री डॉ. एम.बी. पाटील यांनी हिरवा ध्वज दाखवून प्रारंभ केला.
यावेळी मंत्री महोदयांनी बोलताना सांगितले की, व्यसनापासून दूर राहून सुंदर जीवन निर्माण करण्यासाठी जनजागृती करण्याच्या उद्देशाने ड्रग्स फ्री कर्नाटक, फिटनेस फॉर ऑल आणि आमचे पोलिस आमचा अभिमान याविषयी कर्नाटक पोलिस रन-2025 आयोजित करण्यात आला आहे. सामाजिकदृष्ट्या प्रबोधन करण्यासाठी अशा कार्यक्रमांची आवश्यकता आहे. अशा कार्यक्रमांचे उद्दिष्ट पूर्ण करण्यासाठी सामाजिक संघटनांनी, शाळा आणि महाविद्यालयांनी एकत्र येऊन मजबूत समाज निर्माण करण्यासाठी पुढे यावे, असे सांगितले.
ड्रग्सच्या नियंत्रणात जनसहभाग अत्यंत महत्त्वाचा आहे. प्रत्येकाने मानसिक आणि शारीरिक आरोग्य राखणे आवश्यक आहे, म्हणून अशा कार्यक्रमाद्वारे जनजागृती होणे आवश्यक आहे. जिल्हा प्रशासन देखील विविध कार्यक्रमांच्या माध्यमातून जागरूकता निर्माण करत आहे. पालकांनी त्यांच्या मुलांबाबत काळजी घेत, त्यांना कोणत्याही व्यसनास बळी पडू देऊ नये, याची काळजी घ्यावी असे सांगून ते म्हणाले समाजाच्या सुरक्षेसाठी २४ तास कार्यरत असलेल्या पोलिसांनी देखील शारीरिक आणि मानसिक आरोग्य राखण्यासाठी दररोज किमान एक तास व्यायामास वेळ देऊन स्वतःच्या प्रकृतीची काळजी करावी, असे त्यांनी सांगितले.
जिल्हा पालकमंत्री डॉ. एम.बी. पाटील, आमदार विठ्ठल कटकदोंड, जिल्हाधिकारी टी. भूबलन, जिल्हा पोलिस प्रमुख लक्ष्मण निम्बरगी यांनी मॅरेथॉनमध्ये सहभागी स्पर्धकांना प्रोत्साहन दिले
मॅरेथॉन रन गोलगुम्बजपासून सुरू होऊन, जिल्हा क्रीडांगण, बसवेश्वर चौक, गांधी चौक, शिवाजी चौक, वॉटर टॅंक सोलापूर रस्ता मार्गे जिल्हा पोलिस कवायत मैदानात संपन्न झाली.
अतिरिक्त जिल्हा पोलिस अधीक्षक शंकर मारीहाळ, रामनगौड हट्टी, डिव्हायएसपी बसवराज यलिगार यांच्यासह जिल्हा पोलिस विभागाचे अधिकारी व कर्मचारी, विविध संघटनांचे सदस्य, आणि नागरिक मॅरेथॉनमध्ये सहभागी झाले होते.
