शांतिकुटीरमध्ये विद्यार्थ्यांसाठी ज्ञान संवर्धिनी शिबिर संपन्न
विजयपूर/ प्रतिनिधी- दिपक शिंत्रे
भारतीय सुराज्य संस्था आणि शांतिकुटीर ट्रस्टच्या अंतर्गत, ज्ञानसंपन्न शिक्षणाने व्यक्तिमत्त्व विकास करणारे शिबिर शांतिकुटीर, कन्नूर येथे संपन्न झाले
बंगळुरू येथील दिशा भारत संस्थेचे श्री. प्रदीप नटराज, श्रीमती स्नेहा दामले, श्री. दीक्षित कुशलप्पा आणि शांतिकुटीरचे साधक श्री. श्रीकृष्ण हे प्रमुख मार्गदर्शक म्हणून उपस्थित होते. एक्सेलेंट आणि वेद अकादमीचे विद्यार्थी बसने प्रवास करून शांतिकुटीर आश्रमाच्या परिसरात आले. त्यांनी प्रथम आनंदाने आश्रमाचा परिसर पाहिला आणि नंतर सद्गुरु महाराजांच्या समाधी मंदिराजवळील सभागृहात दाखल झाले. उपस्थित शिक्षकवर्ग आणि 550 दहावीच्या विद्यार्थ्यांचे स्वागत करण्यात आले.
यानंतर श्रीकृष्ण गुरूजी यांच्या मार्गदर्शनाखाली सामूहिक भजन, नामस्मरण आणि आरतीने कार्यक्रमाची सुरुवात झाली. त्यांनी विद्यार्थ्यांनी आत्मसात करावयाच्या सद्गुणांबाबत मार्गदर्शन केले. व्यक्तिमत्त्व उंचावण्यासाठी आवश्यक असलेल्या प्रामाणिकता, पालकांप्रती आदर, वेळेचा सदुपयोग आणि सातत्यपूर्ण परिश्रम यासारख्या दैवी गुणांची माहिती त्यांनी दिली. 'धन मिळवायचं, पण लोकांना दिसणार नाही असं, आणि रोज हरिहर ब्रह्मादिक देखील "होय, होय, होय" म्हणतील असं' या अनुभूतीपर पदाचे अभिनयाद्वारे सादरीकरण केले. तसेच श्री समर्थ सद्गुरु गणपतराव महाराजांच्या जीवनातील प्रसंगांचे उदाहरण देत नीती आणि आचारधर्म शिकवले.
यानंतर श्री. प्रदीप नटराज यांनी जीवनातील भूमिका कोणती असावी, ती कशी घ्यावी, अभ्यासात एकाग्रता कशी साधावी आणि स्मरणशक्ती वाढवण्याच्या तंत्रांबाबत माहिती दिली. त्यांनी महापुरुषांचे प्रसंग सांगत भारतीय संस्कृतीशी संबंधित प्रश्नमंजूषा (क्विझ) घेतली. सद्यस्थितीतील समस्या आणि त्यावर उपाय यांची चर्चा केली. तसेच, यशस्वी होण्यासाठी 'C3' – म्हणजेच Character (चारित्र्य), Culture (संस्कृती) आणि Country (देश)** यांचे महत्त्व सांगितले.
श्री. दीक्षित कुशलप्पा यांनी "फक्त पुस्तकांचा अभ्यास पुरेसा नाही, शारीरिक आणि मानसिक सामर्थ्यदेखील आवश्यक आहे" असे सांगत योगासने, प्राणायाम यांचे महत्त्व स्पष्ट केले. त्यांनी व्यायाम आणि साधनेच्या माध्यमातून यश कसे मिळवता येईल, याची प्रात्यक्षिके घेतली.
श्रीमती स्नेहा दामले यांनी स्वामी विवेकानंदांच्या बालपण, विद्यार्थी जीवन आणि त्यांचे राष्ट्रभक्ती व देशप्रेम याबद्दल सखोल माहिती दिली. विद्यार्थ्यांच्या चारित्र्याचा विकास, शिस्तबद्ध वर्तन आणि भारतीय संस्कृतीचे रक्षण कसे करावे यावर त्यांनी प्रभावी मार्गदर्शन केले, ज्यामुळे उपस्थित विद्यार्थी प्रभावित झाले.
सुमारे सात तास चाललेल्या या कार्यशाळेच्या शेवटी एक्सलेंट शाळेच्या विद्यार्थीनी कु. अक्षता शिंदे, भाग्यश्री डोनगी आणि सच्चिदानंद मुळवाडी यांनी आपले अनुभव व्यक्त करताना सांगितले की, "या शिबिरातून आम्ही जीवनात आत्मसात करावयाच्या गोष्टी शिकल्या असून, आमच्या जीवनाचा मजबूत पाया तयार झाला आहे. या ठिकाणाहून आम्ही मूल्यांची जपणूक करण्याचा संकल्प करत परतत आहोत."
या वेळी शाळेचे प्राचार्य राम सर, वेद समूह शिक्षण संस्थेचे संस्थापक अध्यक्ष शिवानंद केळर, शांतिकुटीर ट्रस्टचे विश्वस्त विश्वनाथ पाटील, सतीश टिकोटी, शिक्षकवर्ग आणि कार्यकर्ते उपस्थित होते. शेवटी, प्रत्येक विद्यार्थ्यास श्री समर्थ सद्गुरु गणपतराव महाराजांचे संदेश असलेले भित्तीपत्रक आणि प्रसाद देण्यात आला.
