दोन मुखवटाधारी चोरांनी देशी पिस्तूल दाखवून सोन्याच्या दुकानावर दरोडा
विजयपूर/ प्रतिनिधी- दिपक शिंत्रे
: चित्रपटाच्या धर्तीवर हेल्मेट घालून युनिकॉर्न दुचाकीवर आलेल्या दोन मुखवटाधारी चोरांनी देशी पिस्तूल दाखवून सोन्याच्या दुकानावर दरोडा टाकल्याची घटना सोमवारी चडचण तालुक्यातील हलसंगी गावात घडली.
सोमवारी दुपारी सुमारे 3 वाजता हलसंगी गावातील महादेव कांचागार यांच्या मालकीच्या सोन्याच्या दुकानावर दोन मुखवटाधारी चोर दुचाकीवर येऊन दुकानातील सोने व चांदीचे दागिने लुटून फरार झाले. आधीच नियोजन केल्याप्रमाणे, चित्रपटासारख्या पद्धतीने हेल्मेट, जॅकेट व हातात ग्लोव्हज घालून बुलेट मोटारसायकलवर आलेल्या दरोडेखोरांनी पिस्तूल दाखवून दुकानातील सुमारे 205 ग्रॅम सोन्याचे दागिने आणि 1 किलो चांदी लुटली. ही घटना जवळील सीसीटीव्ही कॅमेऱ्यात कैद झाली आहे.
दरोड्याच्या वेळी दुकानाजवळ एक वृद्ध महिला आली होती. तात्काळ मुखवटाधारी चोरांनी तिच्यावर देशी पिस्तूल रोखून तिला घाबरवून पाठवले. इतकेच नव्हे तर परिसरात दहशत निर्माण करण्यासाठी त्यांनी हवेत दोन राऊंड गोळीबार केला. यावेळी आत्मलिंग हुगार नावाच्या तरुणाच्या उजव्या पायाला गोळी लागली असून त्याला तात्काळ विजयपूरमधील खासगी रुग्णालयात दाखल करण्यात आले आहे.
घटनास्थळी जिल्हा पोलीस अधीक्षक लक्ष्मण निम्बरगी, अतिरिक्त पोलीस अधीक्षक रामनगौडा हट्टी, डीवायएसपी कट्टीमणी आणि निरीक्षक परशुराम मनगुळी यांच्यासह वरिष्ठ अधिकाऱ्यांनी भेट देऊन पाहणी केली. दरोड्यानंतर आरोपी काही क्षणातच सोन्या-चांदीसह महाराष्ट्राच्या सीमेच्या दिशेने फरार झाल्याचे सांगितले जात आहे.
या प्रकरणी झळकी पोलीस ठाण्याच्या हद्दीत गुन्हा दाखल करण्यात आला असून मुखवटाधारी आरोपींच्या शोधासाठी पोलीस जाळे पसरत आहेत. सीसीटीव्ही फुटेजच्या आधारे विशेष पथके तयार करण्यात आली असून सीमावर्ती भागात कडक बंदोबस्त ठेवण्यात आला आहे. दरोडेखोरांना पकडण्यासाठी तपास वेगाने सुरू आहे.
---
**अतिरिक्त माहिती :**
हलसंगी गावातील महादेव कांचागार यांच्या मालकीच्या सोन्याच्या दुकानावर दोन मुखवटाधारी चोर दुचाकीवर येऊन सुमारे 205 ग्रॅम सोन्याचे दागिने आणि 1 किलो चांदी लुटून फरार झाले. याच वेळी शेजारच्या मोबाईल दुकानाचे मालक अनिल बसन्ना गलगली हे दरोड्याचा व्हिडिओ मोबाईलमध्ये रेकॉर्ड करत असल्याचे चोरांच्या लक्षात आले. त्यामुळे त्यांनी त्यांच्यावर गोळी झाडली. बाजूलाच उभ्या असलेल्या 18 वर्षांच्या तरुणाच्या पायाला गोळी लागली. त्याला तात्काळ रुग्णालयात दाखल करण्यात आले असून त्याला कोणताही जीवित धोका नाही आणि तो उपचार घेत आहे, अशी माहिती जिल्हा पोलीस अधीक्षक लक्ष्मण निम्बरगी यांनी दिली.
