राष्ट्रीय महामार्ग-५० अत्यंत दयनीय अवस्थेत, दुरुस्तीसाठीठोस पावले उचलण्याची मागणी
विजयपुर/ प्रतिनिधी - दिपक शिंत्रे
राष्ट्रीय महामार्ग-५० (NH-50), जो राष्ट्रीय महामार्ग प्राधिकरणाकडून बांधण्यात व देखभाल करण्यात आला आहे, विजयपुर–आलमट्टी या पट्ट्यात अत्यंत दयनीय अवस्थेत गेला असून, प्रवाशांच्या जीवाला गंभीर धोका निर्माण झाला आहे. वारंवार तक्रारी करूनही महामार्ग दुरुस्तीसाठी ठोस पावले उचलली गेलेली नाहीत. परिणामी, अपघात, जखमी होण्याच्या घटना आणि जीवितहानी सातत्याने घडत आहेत.
सोलापूर ते चित्रदुर्गा असा पसरलेला NH-50 हा महाराष्ट्र, कर्नाटक, तामिळनाडू आणि आंध्र प्रदेश या उत्तर व दक्षिण राज्यांना जोडणारा महत्त्वाचा दुवा आहे. मात्र, विजयपुर ते आलमट्टी दरम्यानचा रस्ता प्रचंड खराब झाला असून अनेक ठिकाणी डांबरी थर उखडला आहे आणि खोल खड्ड्यांमुळे हा महामार्ग दुचाकीस्वार व वाहनचालकांसाठी मृत्यूचा सापळा ठरत आहे.
स्थानिक रहिवाशांच्या मते, रस्त्याच्या खराब अवस्थेमुळे अपघात हे नित्याचेच झाले आहेत. अनेक ठिकाणी योग्य चौक चिन्हांकन, दुभाजक, अपघातप्रवण क्षेत्रांची चेतावणी फलक तसेच वर्दळीच्या भागांची माहिती देणारे फलक नसल्याने परिस्थिती अधिकच गंभीर झाली आहे. परिणामी, या पट्ट्यावर मृत्यूंची संख्या वाढतच आहे.
निदगुंदी–बिरलादिन्नी रस्ता तसेच निदगुंदी–यलगूर क्रॉस हा भाग अत्यंत खराब अवस्थेत असल्याचे सांगितले जात आहे. निदगुंदी शहरातून जाणारा महामार्ग खड्ड्यांनी भरलेला आहे. काही ठिकाणी स्पीड ब्रेकर बसवण्यात आले असले तरी, पुरेशा सूचना फलकांच्या अभावामुळे अपघातांचा धोका वाढला आहे.
हुणगुंद ते विजयपुर या NH-50 च्या दुरुस्तीचे काम गेल्या वर्षी ऑगस्टमध्ये सुरू झाल्याचे सांगितले जाते, मात्र ते अद्याप या भागापर्यंत पोहोचलेले नाही. दुरुस्ती कधी पूर्ण होणार याबाबतही कोणतीही स्पष्टता नसल्याने प्रवाशांच्या अडचणींमध्ये भर घालत, रस्त्याची अवस्था अत्यंत खराब असतानाही वाहनचालकांकडून मोठ्या प्रमाणात टोल वसूल केला जात आहे. केवळ एका महिन्यात, गोलसंगी परिसरात खराब महामार्गामुळे झालेल्या वेगवेगळ्या अपघातांत तीन जणांचा मृत्यू झाल्याचे वृत्त आहे.
विजयपुर–हुणगुंद टोल प्लाझाचे व्यवस्थापक कर्मचारी दत्तात्रेय नायक यांनी सांगितले की, हुणगुंद ते विजयपुर दरम्यान NH-50 चे दुरुस्ती काम हाती घेण्यात आले असल्याचे सांगितले तर निदगुंदी शहरातील नेते प्रल्हाद करियन्नावर यांनी तातडीने दुरुस्तीची मागणी करताना, महामार्गाचा असमतोल पृष्ठभाग आणि सखल भाग त्वरित दुरुस्त करणे अत्यावश्यक असल्याचे सांगितले, अन्यथा आणखी दुर्घटना घडण्याची शक्यता आहे.
