प्रामाणिक रिक्षाचालक– बंदेनवाज, रिक्षात विसरलेले लॅपटॉप व महत्त्वाचे कागदपत्रे दिली परत
विजयपूर/ प्रतिनिधी- दिपक शिंत्रे
शहरात भाड्याचे रिक्षा चालवत उपजीविका करणारे रहिवासी बंदेनवाज बापुलाल बडकल यांनी आपल्या ऑटोरिक्षात विसरून राहिलेला लॅपटॉप आणि शाळेची महत्त्वाचे कागदपत्रे त्यांच्या मालकांकडे परत देत प्रामाणिकतेचे उत्कृष्ट उदाहरण घातले आहे.
अंकलगी येथील कर्नाटक पब्लिक स्कूलचे प्रभारी मुख्याध्यापक बसवराज होसामणी हे सकाळी आठ वाजता शालेय क्रीडा साहित्य व मध्यान्ह भोजनासाठी लागणाऱ्या भाज्यांसह शाळेकडे निघाले होते. घाईगडबडीत त्यांनी लॅपटॉप ऑटोतच विसरले. मधल्या मार्गात त्यांना हे लक्षात आले. आवश्यक साहित्य शाळेत सुपूर्द करून ते पुन्हा विजयपूरला परत येऊन गांधी चौक पोलीस ठाण्यात तक्रार नोंदवली.
मुख्याध्यापकांनी बॅगमध्ये शाळेची महत्त्वाची कागदपत्रे असल्याचे पोलिसांना सांगितल्यावर बसस्टँड पोलीस ठाण्याचे सुनील चव्हाण यांनी सीसीटीव्ही फुटेज उपलब्ध करून दिले. फुटेजमध्ये रिक्षाचा नंबर स्पष्ट दिसत नसला तरी रिक्षाच्या काचांवरील डिझाइन पाहून मुख्याध्यापक आणि त्यांचे भाऊ मल्लेश यांनी गांधी चौकात ती रिक्षा शोधण्यास सुरुवात केली.
मुख्याध्यापकांना पाहताच संबंधित रिक्षाचालक बंदेनवाज यांनी त्यांना ओळखले आणि,
**“साहेब, तुम्ही सकाळी लॅपटॉप विसरून गेला होता,”** असे सांगत प्रामाणिकपणे वस्तू परत केल्या. त्यांनी मुख्याध्यापकांना घरी घेऊन जाऊन लॅपटॉप सुरक्षित परत दिले.
बंदेनवाज म्हणाले,
**“आज तुम्ही आला नसता, तरीही मी तुम्हाला शोधून लॅपटॉप परत दिलाच असता.”**
त्यांच्या प्रामाणिकतेबद्दल कृतज्ञता व्यक्त करत मुख्याध्यापकांनी त्यांच्या मुलीच्या हातात बक्षिस म्हणून*₹1000 ठेवून आभार मानले
यापूर्वीही एका महिलेला दोन तोळ्यांचे सोने रिक्षात विसरले होते आणि तेही बंदेनवाज यांनी त्या महिलेला परत देत आपली प्रामाणिकता सिद्ध केली होती.
