विजयपूरमध्ये कुख्यात गुंडांवर गुंडा कायद्यानुसार कारवाई
विजयपूर/ प्रतिनिधी- दिपक शिंत्रे
समाजातील शांतता आणि कायदा-सुव्यवस्थेला धोका निर्माण करणाऱ्या दोन कुख्यात गुंडांना गुंडा कायद्यांतर्गत अटक करण्यात आली आहे
आदर्शनगर आणि गोलगुंबज पोलीस ठाण्याच्या हद्दीतील गुंड सुरेश @ सागर राठोड (वय 43) आणि सय्यद फजलुल्ला सैफुद्दीन इनामदार (वय 31) यांच्याविरुद्ध अनेक गंभीर गुन्हे दाखल होते.
सुरेश राठोड याच्यावर खून, खुनाचा प्रयत्न तसेच भारतीय आयुध कायदा अंतर्गत एकूण 14 गुन्हे नोंद आहेत. तर फजलुल्ला इनामदार याच्यावर खून, खुनाचा प्रयत्न आणि दरोड्याचा प्रयत्न अशा एकूण 4 गुन्ह्यांची नोंद आहे. हे दोघेही वारंवार गुन्हेगारी कृत्यांमध्ये सहभागी होत असून सार्वजनिक शांततेला बाधा आणत होते.
या पार्श्वभूमीवर, त्यांच्या विरोधात गुंडा कायद्यांतर्गत कारवाई करण्यासाठी पोलीस विभागाने विजयपूर जिल्हाधिकारी कार्यालय यांच्याकडे प्रस्ताव सादर केला होता. त्यानुसार जिल्हाधिकाऱ्यांनी 11 एप्रिल 2026 रोजी अटकेचे आदेश जारी केले.
या आदेशानुसार, दोन्ही आरोपींना अटक करून अनुक्रमे मंगळूरू केंद्रीय कारागृह आणि बल्लारी केंद्रीय कारागृह येथे हलविण्यात आले.
पोलीस विभागाने दिलेल्या माहितीनुसार, समाजातील शांतता व सार्वजनिक सुरक्षेच्या दृष्टीने ही कारवाई करण्यात आली आहे.
