सरकारी मालमत्ता बळकावणाऱ्या भूमाफियांविरोधात कडक कायदेशीर कारवाई - आ. बसवनगौडा पाटील
विजयपूर / प्रतिनिधी- दिपक शिंत्रे
विजयपूर शहरात काही माजी नगरसेवक समाजविघातक शक्तींशी हातमिळवणी करून शहरातील मोकळी मैदाने, उद्याने तसेच अनेक दिवसांपासून शहर सोडून इतर राज्यांत मजुरीसाठी गेलेल्या लोकांची मालमत्ता बळकावणारी टोळी कार्यरत असल्याचा आरोप शहराचे आमदार बसवनगौडा पाटील यांनी केला.
शहरातील गांगबावडी परिसरात सार्वजनिक उपयोगासाठी — उद्यान व सांस्कृतिक भवनासाठी राखीव ठेवलेल्या जागेबाबत पूर्वी गैरप्रकार होत होते. तसेच शहरातील चार प्रभाग नागठाण मतदारसंघाच्या हद्दीत येणाऱ्या गच्चिनकाट्टी कॉलनीतील राखीव सर्वे क्रमांक २१/ह, प्लॉट क्रमांक २१ या जागेवर बनावट करारपत्र तयार करून सरकारी मालमत्ता बळकावण्याचा प्रयत्न एका गटाने केल्याची टीका त्यांनी केली.
महापालिका आयुक्त, एडीएलआर आणि तहसीलदार यांनी ही जागा सरकारी मालमत्ता असल्याचे स्पष्ट केले असून, पुढील आठवड्यात कंपाउंड उभारून जागा संरक्षित करण्यासाठी कायदेशीर पावले उचलण्यात येत असल्याचे त्यांनी सांगितले.
**वक्फ मालमत्ता बळकावण्याचा डाव :** शहरातील सोलापूर रोडवरील देवगिरी स्मशानभूमीजवळील सरकारी जमिनीवर काही भूमाफिया डोळा ठेवून असल्याचा आरोपही त्यांनी केला.
कोणीही वाद निर्माण करून गुंडगिरी केल्यास त्यांच्यावर कठोर कायदेशीर कारवाई करण्यात येईल, असा इशाराही त्यांनी दिला.
ही जागा वाचवण्यासाठी स्थानिक रहिवाशांचा लढा आणि महापालिका सदस्यांचे सहकार्य महत्त्वाचे ठरल्याबद्दल त्यांनी आभार मानले. ही जागा सरकारी मालमत्ताच असल्याचे स्पष्ट करण्यात आले असून, तात्काळ जागेभोवती “महापालिका मालमत्ता” असा फलक लावण्याचे निर्देश महापालिका आयुक्तांना देण्यात आले आहेत. तसेच लवकरच कंपाउंड भिंत बांधून नागरिकांच्या सोयीसाठी तेथे उद्यान विकसित करण्यात येणार असल्याचे त्यांनी सांगितले. या प्रसंगी माजी उपमहापौर राजेश देवगिरी व इतर उपस्थित होते.
